سِرّي للبنات وبَس .. بقلم / د . رجب عبد اللطيف محمد

سِرّي للبنات وبَس:

✳️يا بنتي، الدنيا بقت سريعة، وكل حاجة بقت متاحة، لكن في حاجات غالية لازم نحافظ عليها، وأهمها سمعتك وجسمك. النهارده، بقت البنات بتتعرض لضغوط كتير، سواء من السوشيال ميديا أو من الناس حواليها، لكن لازم تفهمي إن قيمتك مش بعدد اللايكات، ولا بنوع اللبس اللي بتلبسيه، ولا بالكلام المعسول اللي بتسمعيه.

🔶 سمعتك.. كنزك الحقيقي

السمعة زي الزجاج الشفاف، لو اتخدش او اتكسر صعب يرجع زي ما كان. الناس بتتكلم، والمجتمع مش بيسيب حاجة، فاختاري دايمًا تصرفاتك وكلامك وأصحابك بعناية. ما تخليش حد يستغلك بكلام حلو، أو يضحك عليكِ بحب مزيف، لأن اللي بيحبك بجد هيصونك، مش هيحاول ياخد منك حاجة غصب عنك.

🔶 جسمك.. ملكك إنتِ وبس

جسمك مش لعبة، ومش حاجة لأي حد، هو أمانة عندك، لازم تحترميه وتحافظي عليه. اللبس الجريء، التصرفات المستفزة، أو الانسياق ورا الموضة العمياء مش هي اللي هتخليكي مميزة، بالعكس، اللي يحترم نفسه هو اللي الناس بتحترمه.

🔶 نصايح من القلب

1️⃣اختاري أصحابك بحكمة: مش كل واحدة تضحك في وشك تبقى صاحبتك، الصحاب الصح هما اللي هيخافوا على سمعتك قبل سمعتهم.

2️⃣ما تصدقيش الكلام الفارغ: “ما حدش هيعرف”، “جربي مرة”، “عيشي حياتك” – كلها جمل بتضيع بنات كتير، ففكّري قبل أي خطوة.

3️⃣كوني قوية وواثقة في نفسك: جمالك مش بس في شكلك، لكن في احترامك لنفسك، في طريقة كلامك، في وقارك، وده اللي بيخليكي ملكة بجد.

4️⃣ما تتنازليش أبدًا عن قيمك: أي حد بيحبك بجد مش هيطلب منك تتخلي عن احترامك لنفسك، ولا عن مبادئك.

🔶 وفي الختام

مش مهم عدد اللي بيتابعوكي، ولا كلام الناس عنك، المهم إنك تبقي فخورة بنفسك، إنك تبصي في المرايا وتلاقي إنك بنت محترمة، واثقة، وعارفة حدودك.

لأن في النهاية، اللي حافظت على نفسها، هي اللي بتعيش بكرامة وسعادة.