مين الغلطان.. الأم ولا الأولاد؟…بقلم / د . رجب عبد اللطيف محمد

مين الغلطان.. الأم ولا الأولاد؟

مش كل مشكلة بنسمع عنها ينفع نحكم فيها من أول دقيقة ونقول: ده الغلطان وده المظلوم.. لأن أحيانًا اللي بنشوفه النهارده بيكون نتيجة حاجات اتزرعت من سنين.

والتربية مش مجرد أكل وشرب ولبس وتعليم، التربية أخلاق ودين ورحمة واحترام.. واللي بتزرعه في ابنك وهو صغير، هو اللي ممكن تلاقيه منه لما يكبر.

🟢القصة باختصار:

ست في السيدة زينب كانت بتصرخ بصوت عالي، فالجيران الرجالة المحترمين فتحوا الباب، لقوا ابنها الأكبر وأخوه بيضربوها ضرب شديد جدًا علشان مش راضية تديهم فلوس، والقت الأجهزة الأمنية القبض عليهم.

تحية لرجال الداخلية.

🟢نتعلم من القصة دي إيه؟

🔹لو ما ربيتش ابنك وهو صغير على الصلاة والخوف من ربنا، بكرة ممكن يضربك علشان ما بيخافش من ربنا.

🔹ولو الأم جاحدة وقاسية على ولادها وهم صغيرين، بكرة ممكن يبهدلوها ويضربوها لما يكبروا.

🟥مفيش مبرر مهما كان لضرب الأم، لكن لازم تربي أولادك صح وهما صغيرين علشان يرحموك لما تكبر.

قال تعالى:

﴿وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا﴾

🟢وفي الختام:
مهما كانت الخلافات ومهما كان تقصير الأب أو الأم، مفيش أي مبرر للعنف أو ضرب الأم.

لكن برضه لازم نفهم إن تربية الأولاد مسؤولية كبيرة، وإن الرحمة والاحترام والخوف من ربنا لازم يتزرعوا في البيت من الصغر.

إحنا مش بنربي أولادنا علشان يكبروا وبس.. إحنا بنربيهم علشان لما نكبر، نلاقي فيهم الرحمة والسند والأمان.