ازاي تقضي على قلق وتوتر الامتحانات ؟ …بقلم / د . رجب عبد اللطيف محمد

✍️ ازاي تقضي على قلق وتوتر الامتحانات ؟

​فترة الامتحانات هي من أصعب الفترات علي كل طالب ؛ بس الحقيقة إن التوتر ده طاقة ممكن نوجهها لصالحنا لو عرفنا نسيطر عليها.

القلق مش بس بيضيع التركيز، ده ممكن يخليك تنسى معلومات إنت عارفها كويس.

عشان كده، لازم تتعامل مع يوم الامتحان بذكاء وهدوء.
في المقالة دي هنتعرف مع بعض علي ​خطوات السيطرة على يوم الامتحان:

​1️⃣ روح بدري:
الاستعجال والجري الصبح بيزودوا ضربات القلب وبيخلوك تدخل اللجنة مشحون توتر. الوصول بدري بيديك فرصة تأخد على جو المكان وتستقر نفسياً.

​2️⃣ انشغل بذكر الله:
قبل ما تستلم الورقة، خلي لسانك رطب بذكر الله، قال تعالي “ألا بذكر الله تطمئن القلوب“.
الهدوء الروحاني ده كفيل يمسح أي رهبة من قلبك ويفتح بصيرتك.

​3️⃣ اكتب بياناتك أول حاجة:
بمجرد استلام الورقة، ابدأ بكتابة اسمك ورقم جلوسك وكل بياناتك. الخطوة دي مش بس روتينية، دي بتخلي “العقل التحليلي” يبدأ يشتغل ويفصلك عن مشاعر القلق والخوف.

​4️⃣ اوعى تقرأ الامتحان كله مرة واحدة:
من أكبر الأخطاء إنك تقرأ كل الأسئلة في أول دقيقة، ده بيعمل “تشتت” وتوتر خاصة لو لقيت سؤال صعب.

​5️⃣ ابدأ بالسؤال السهل:
أول ما تفتح الورقة، دور على السؤال اللي إنت ضامنه وابدأ بيه. ده بيشغل العقل التحليلي وبيديك ثقة كبيرة في نفسك بتنعكس على باقي الإجابات.

​6️⃣ متبصش في الساعة كل شوية:
مراقبة العقارب بتوتر جداً. جاوب بحكمة وهدوء، وخلي ليك نظرة عامة على الوقت في نص الامتحان وقبله بنهايته بفترة كافية، من غير ما تخلي الساعة تسيطر عليك.

​7️⃣ راجع كتير لو في وقت:
لو خلصت بدري، استغل كل دقيقة في المراجعة. أحياناً العقل بيغفل عن تفاصيل بسيطة أو كلمة “لا” في السؤال ممكن تغير المعنى تماماً، فالمراجعة هي صمام الأمان.

​8️⃣ لما تخلص.. اوعى تراجع:
بمجرد ما تخرج من باب اللجنة، اقفل صفحة المادة دي تماماً. المراجعة مع زمايلك بعد الامتحان مش هتغير النتيجة، بل بالعكس ممكن تحبطك وتأثر على تركيزك في المادة اللي جاية.

🟥في الختام ​:
​في النهاية، الامتحان مجرد وسيلة لقياس اجتهادك، والهدوء هو مفتاح النجاح. اعمل اللي عليك، واتبع الخطوات دي، وتوكل على الله واسأله التوفيق.