✍️ارجع لمراتك بدل ما ترجع على فضيحة …بقلم / د . رجب عبد اللطيف محمد

✍️ارجع لمراتك بدل ما ترجع على فضيحة

🟢 في ناس بتسافر وتفتكر إن المسؤولية خلصت بمجرد إنها بعتت فلوس للبيت، لكن الجواز مش فلوس وبس. مراتك محتاجة وجودك واهتمامك وكلمتك الحلوة، وولادك محتاجين يشوفوك وتكون قريب منهم. الغياب الطويل والمشاكل المستمرة ممكن يعملوا فجوة كبيرة بين الزوجين، ومع الوقت الفجوة دي ممكن تكبر وتسبب مشاكل محدش كان يتوقعها.

🟢 في شباب مبتتعلمش، وبنسمع كل شوية عن زوجة بتخون جوزها وهو مسافر.

🟢 ومع ذلك بيسافر ويسيب مراته بالسنين، وكمان كل شوية خناقات ومشاكل.

🟢 هو إنت ليه مش مقتنع إن مراتك لها احتياجات جنسية وعاطفية، ووارد شاب يلف على مراتك، يعوضها الحنان، وتحبه ويحصل بينهم علاقة جسدية ، وممكن كمان تجيب عيال منه وتصرف على ولاد غيرك؟ وده حصل كتير، وكل شوية فضيحة جديدة.

🟢 عاوز تسافر؟ سافر، بس لازم وإنت مسافر تكلم مراتك بحب وشوق ومن غير مشاكل، ومتغيبش أكتر من سنة، وخد إجازة، شبعها عاطفيًا وجنسيًا، أو خدها معاك تعيش معاك ، وارجعوا مع بعض.

🟢 الخلاصة : السفر عشان تحسن مستوى حياتكم حاجة كويسة، لكن متخليش السفر يهدم البيت اللي إنت بتتعب عشانه. خلي مراتك حاسة إنك موجود معاها حتى لو بينكم مسافات، وخلي ولادك حاسين إن أبوهم قريب منهم. الجواز محتاج فلوس، آه، لكنه كمان محتاج حب واهتمام ووجود واحتواء.

الفلوس مش كل حاجة.
مراتك وأولادك أهم.